BUTUAN CITY – I-transmit na sa kamara ngadto sa Senado ang ilang bersyon sa balaudnon nga nag-apruba sa pagpabalik sa silot-kamatayon.
Gibutyag ni Butuan City og Agusan del Norte First District Congressman Lawrence Lemuel Fortun nga tungod kay duna usa’y kaugalingong bersyon niini nga balaudnon ang Senado hinungdan nga tukion sa taas balay-balauranan ang ilang bersyon.
Higayong ma-aprubahan sa senado ang ilang bersyon sa maong balaudnon, dinhi na himuon ang bicameral conference committee nga langkuban sa mga representante sa duha ka balay balauranan aron i-reconcile ang ilang managlahing probisyon.
Giklaro sa magbabalaud nga sa pagkakaron, dili na sila mamahimong magduso og amendments apan kung hingpit na kining mapirmahan ni Pangulong Rodrigo Duterte, dinhi na sila mamahimong magduso og balaudnon alang sa himuong pipila ka mga amendments ilabina ang pagdugang sa mga kremin nga angayang silutan og kamatayon.
Samtang atol sa bicameral conference, higayong mag-reconcile ang bersyon sa kamara og senado, bugtong ang mga bersyon lang nga anaa sa duha ka balay bala-uranan ang adaptahon. (Beth Ruiz)
