BUTUAN CITY – Misangpot sa tensyon ang unta malipayong sashing ceremony sa Miss Universe 2025 nga gipahigayon sa Thailand kagahapon, Martes, Nobyembre 4.
Kini human gitas-an og tingog sa head sa host country organizing committee nga si Nawat Itsaragrisil ang kandidata sa Mexico nga si Fatima Bosch, hinungdan sa iyang pag-walkout nga gisundan usab sa pipila ka kandidata gikan sa Latin America, Asia, ug Africa.
Nag-ugat kini dihang gisaway matud pa si Miss Mexico human niya gibalibaran ang sponsor photo shoot ug misugot lamang sa mga kalihokan nga gi-organisa sa Telemundo ug dihang gipasabot niya ang iyang bahin, gipapili siya ni Nawat nga magpabilin o molakaw, busa nag-walkout kini.
Misunod usab kaniya si reigning Miss Universe Victoria Theilvig isip suporta sa Mexican beauty queen nga gisundan sa uban pang mga kandidata.
Makita sa video nga nangayo pa og tabang si Nawat sa security, apan wala nila mapugngi ang mga kandidatang naggawas.
Sa kaulahi-an, naplastar ra sa Miss Universe Thailand ug Miss Universe Organization (MUO) ang panaglalis ug nagpadayon gihapon ang sashing ceremony bisan wala si Nawat.
Nahitabo ang insidente taliwala sa nagpadayon nga tensiyon tali ni MUO President Raul Rocha ug Nawat Itsaragrisil, nga mao usab ang tag-iya sa Miss Universe Thailand franchise ug founder sa Miss Grand International.
Kini nga insidente natigayon pila na lang ka semana adiser ang 74th Miss Universe coronation night nga ipahigayon karong Nobyembre 21 sa Impact Challenger Hall, Nonthaburi, Thailand.
