BUTUAN CITY- Hingpit nang gibuhian ang gidagit sa New People’s Army kon NPA nga usa ka Datu o Tribal Chieftain bugti sa gipangayong mga pagkaon sa niaging adlaw.
Sa pagsaysay ni Capt. Francisco Garillo- 36th Infantry Battalion Philippine Army, samtang natulog si Datu Eusebio Meniano, Municipal Tribal Chieftain sa lungsod sa Carmen, Surigao Del Sur, sa iyang pinuy-anan mga bandang alas 4:00 sa buntag sa may Purok-4, Barangay Hinapoyan sa maong lungsod, kalit kining gisulod sa armadong grupo.
Gigapos pa ang mga kamot niini samtang gidala sa tribal hall sa maong barangay og gitapok ang mga tawo aron ipasabot matud pa kung ngayong siya gidakop.
Human nadawat sa kasundaluhan ang maong taho, gelayon silang naghimu ug hot pursuit operation og naka-engkuwentro pa ang grupo diin nagpabusikad ug landmine adiser misibat sa bukirang bahin dala ang biktima.
Gelayon usab nga nagpulong ang Local Crisis Committee sa maong lungsod og swerte usab nga nakontak ni Barangay Hinapoyan Kapitan Idelyn Iligan diin ang mga demanda sa midagit nga grupo, mga pagkaon sama sa karne, softdrinks, kape og bugas.
Gidala kini sa kapitan kauban ang mga barangay officials sa bukirang bahin og didto hingpit nga gibuhian si Datu Meniano mga alas 3:00 sa nakalabay nga hapon.
