BUTUAN CITY – Paningkamotan sa Department of Information and Communications Technology kon DICT nga ma-block ang delikadong challenge sa internet nga misulod na karun sa Pilipinas.
Sigon ni Asec. Alan Silor sa eksklusibong pakighinabi sa Bombo Radyo Butuan, makig-alayon sila sa mga telecommunication companies kon telcos aron ma-block na ang delikadong mga apps sama sa “Momo,” “Blue Whale” ug uban pang challenges.
Apan aminado ang opisyal nga lisud nang i-block ang IP address sa maong challenge ilabina kay gikan kini sa gawas sa nasud rason nga gi-awhag na lang niini ang mga ginikanang ampingan ang ilang kabataan.
Gitumbok pa niini nga kinahanglang susihon kanunay sa mga ginikanan ang ilang mga bata kung unsa na ang ginahimo niini diha sa social media.
Sugyot pa sa opisyal, angayan usab nga magbutang ang ginikanan og curfew hour sa ilang mga anak diha sa paggamit sa ilang mga gadgets. (Rolan Janea)
