BUTUAN CITY – Gila-umang mamahimong operational na pipila ka adlaw gikan karon ang Butuan Medical Center Molecular Laboratory human nga na-isyuhan na og license to operate ang GeneXpert TB Reference machine.
Sa eksklusibong pakighinabi sa Bombo Radyo Butuan, gipadayag ni Michiko de Jesus, tigpamaba sa Butuan City government, ang maong makina kayang mususi sa 48 ka mga specimen sulod lang sa usa ka adlaw aron masuta kung ang mga swab samples positibo ba o kaha negatibo sa COVID-19.
Ang bugtong na lang nilang gihulat mao ang paggawas na sa license to operate alang sa mismong molecular laboratory aron hingpit na kining maka-operate ilabina nga dugay na kining gi-atangan sa tanan.
Kagahapon, nagpagawas og advisory ang Department of Health kon DOH-Caraga aron ipahibalo sa publiko nga ang tanang specimens nga ipa-ilalom sa RT-PCR test, kinahanglang dalhon didto sa DOH-Center for Health and Development-Caraga RESU alang sa inspeksyon, validation, ug pagsusi sa kompletong impormasyon nga ibutang sa case investigation form ug sa ilang line list.
Ang DOH-Center for Health and Development-Caraga RESU na ang mu-transport sa specimen ngadto sa molecular laboratory.
Ang opisyal nga resulta ipadala ngadto sa DOH-CHD Caraga alang sa pag-harmonize sa data ug ang regional director na ang mupahibalo sa resulta ngadto sa mga local chief executives ug maoy muhimo pagpahibalo pinaagi sa pag-anunsyo niini o kaha sa press release.
Gipahimangnuan usab niini ang publiko nga imintina ang confidentiality sa test results isip pagsunod sa mandatung nakalatid sa Akta Republika 10173 kon mas nailang Data Privacy Act of 2012.
