BUTUAN CITY- Gitaho sa Iranian state television nga ang bag-ong gitudlo nga Iranian Supreme LEader nga si Mojtaba Khamenei, “wounded” matud pa sa nagpadayon nga giyera sa nasud.
Sumala sa state media, si Mojatba gitawag og “janbaz,” o tawo nga nasamdan sa kalaban atol sa gitawag nilang “Ramadan war,” apan wala na kini minhtaga pa og dugang detalye kalabot sa kahimtang niini.
Ang pagtudlo kang Mojtaba nahitabo human mapatay ang iyang amahan nga si Ayatollah Ali Khamenei ug ang asawa niini sa usa ka joint military operation sa U.S. ug Israel sa Tehran niadtong Pebrero 28, kansa maoy nakapasiugda sa kasamtangang giyera.
Sukad sa pagsugod sa panagbangi, wala pa kini makita pag-usab sa publiko.
Nailhan si Mojtaba nga maayong mosulti og English, nakahuman og specialized courses sa psychology ug psychoanalysis, ug adunay kahibalo sa teknolohiya, military sciences, security affairs, ug mga prinsipyo sa politika.
Dugay na kining giila nga maimpluwensyang tawo kansa nagapabilin sa likod sa mga desisyon sa iyang amahan samtang nagpalig-on sa koneksyon sa mga institusyon sa Islamic Republic.
Ang pagkapili niini isip Supreme Leader giisip sa mga analyst nga usa ka lider nga dugay nang adunay impluwensya sa likod sa gobyerno, apan hangtod karon wala pay klaro kung unsa ang sunod niini lakang.
