BUTUAN CITY- Gibutyag ni Gerna Manatad ang Regional Epidemiologist sa Department of Health-Center for Health Caraga nga naka-full blast na ang gimugnang Mobile Vaccination nga alang sa mga lagyong barangay sa nagkaiyang bahin sa rehiyon.
Sa pakighinabi sa Bombo Radyo Butuan, gihatagan og duot ni Dr. Manatad nga ang maong inisyatiba isip dugang lakang sa pagpanghatag og bakuna sa mga katawhan aron adunay dugang proteskyon batok sa covid-19 virus gawas sa mga designated nga vaccination post.
Gipasabot ni Dr. Manatad nga target nga mabakunahan sa mobile vaccination ang mga anaa sa A2 priority group kon kadtong mga Senior Citizens lakip na usab ang mga bedridden nga maglisud na sa pagbyahe ug dili makalugsong sa syudad ug sa mga lungsod sanglit aminado ang mga katigulangan nga mahadluk sila muadto sa mga vaccination post tungod sa hulga sa daghang tao.
Nahimo ang maong sa lakang sa DOH-Caraga pinaagi sa pakig-alayon sa matag LGU ug barangay sa rehiyon. Dinhi sa Butuan City unang naserbisyuhan sa mobile vaccination ang Barangay Nongnong, Bitan-agan ug Barangay Bit-os.
