BUTUAN CITY – Nanumpa na si kanhi Philippine National Police kon PNP chief Nicolas Torre III isip bag-ong general manager sa Metropolitan Manila Development Authority (MMDA) kagahapong adlawa, Disyembre 26.
Gipangunahan ang iyang pagpanumpa ni Executive Secretary Ralph Recto nga gihimo sa Malacanang.
Ang iyang pagdawat sa posisyon, gi-isip niya kini nga hingpit na niyang pag-resign gikan sa PNP, nga nagresulta sa pagkawala sa iyang four-star rank ug naghatag og dalan alang kang PNP Chief Jose Melencio Nartatez madawat ang maong ranggo.
Sumala sa National Police Commission kon NAPOLCOM, ang pagpanumpa ni Torre sa bag-ong posisyon, naghatag og klaro nga liderato sa PNP. Bisan pa sa conflict nga nalambigit sa iyang pag-exit, supportive gihapon ang komisyon sa re-assignment ni Torre.
Sa iyang gamay nga tenure isip PNP chief, nakahimo siya og kasaysayan isip unang PNPA graduate nga nakahupot sa posisyon ug nailhan sa high-level arrests, lakip na kang Pastor Apollo Quiboloy ug kanhi Pangulong Rodrigo Duterte.
