BUTUAN CITY – Andam na ang Metropolitan Manila Development Authority (MMDA) para maghatag og seguridad sa publiko ug mahimong hapsay ang dagan sa trapiko sa umaabot nga ikatulong Trillion Peso March sa Pebrero 25.
Niadtong Biyernes sa dihang mihimo ang MMDA og walk-through sa mga lugar diin mahitabo ang lihok protesta.
Sigon ni MMDA General Manager Usec. Nicolas Torre III nga ang trabaho nila ang seguruhon nga ang nag-unang kalsada maagian samtang gihimo ang lihok protesta.
Dunay koordinasyon na sila sa Quezon City Government lakip na usab sa nagkadaiyang ahensiya para sa nasangpit nga aktibidad.
Magpakatag sila og mga enforcers diin ipatuman ang ilang re-routing para mahimong hapsay ang dagan sa trapiko.
Magbutang usab sila og mga ambulansya, tow trucks, dump trucks ug mga portalets sa nagkadaiyang lugar.
Mahinumdumang gilauman ang daghang mga tawong motambong sa programa tungod kay dungan usab niini ang ika-40 anibersaryo sa EDSA People Power.
