BUTUAN CITY – Gimanduan na ni Police Regional Office kon PRO-13 Director BGen. Romeo Carmat Jr, ang San Miguel Municipal Police Station sa lalawigan sa Surigao del Sur nga maglusad og oroganisadong search operation batuk sa mga armadong kalalakin-an nga maoy responsable sa robbery incident kagahapon didto sa lungsod sa San Miguel.
Madumdumang ang wala mailang mga responsable misulod sa balay ni San Miguel Vice Mayor Rolmar Falcon Basalan pasado alas-3:45 kagahapon sa hapon.
Base sa report gikan sa kapulisan sa maong lungsod, gitawagan matud pa sa mga suspek ang asawa ni Basalan ug mi-demand og kwarta apan wala kini gisanong sa opisyal.
Gidala sa mga suspek sa ilang pagsibat ang usa ka kalibre .45 nga pistola ug usa ka airsoft gun nga gipanag-iyahan sa bise mayor. Wala pa makontento ang mga responsable, nagtanom pa sila og usa ka improvised explosive device kon IED ug nagbarikada kilid sa dalan sa Brgy Siagao sa maong lungsod.
Malampusong nakuha sa Explosive Ordnance Disposal kon EOD ug K9 unit sa Surigao del Sur Police Provincial Office ang nasangpit nga eksplosibo.
Dali usab nga nakig-alayon ang kapulisan sa San Miguel ngadto sa ilang AFP counterparts ug sa 2nd Provincial Mobile Force Company, ilabina nga ang maong lugar, natumbok man nga mass-based supporter sa NPA.
