BUTUAN CITY – Atol sa adlaw sa kalag-kalag, mitahan si Alias Kakar, squad leader sa Platoon 1 SDG sa Guerilla Front 30, Northeastern Mindanao Regional Committee kon NEMRC ngadto sa 7th Special Forces “Spartans” Company (7SFC), 3rd Special Forces “Arrowhead” Battalion diin gitudlo niini ang lokasyon sa usa ka 5.56mm M4 Carbine Bushmaster Rifle sa bukirang parte sa Purok Bombels, Awisan, Tandag City, Surigao del Sur.
Ang nasangpit nga surrenderee gikustudiya sa 7SFC headquarters sa Mararag, Marihatag, Surigao del Sur alang sa tukmang custodial debriefing.
Sumala pa ni Alias Kakar, 34-anyos gi-recruit siya ni Otillo Galagate, miyembro sa Militia ng Bayan sa barangay Tina, San Miguel, sa maong probinsiya mga 3 ka tuig na ang nakalabay.
Nasayran nga ang probinsiyal nga kagamhanan sa Surigao del Sur’ hugot nga misuporta sa Whole-of-Nation Approach to End Local Communist Armed Conflict ni Presidente Rodrigo Roa Duterte diin duna kini positibong resulta sa tibook rehiyon sa CARAGA.
Bag-ohay lang gitudlo si SurSur Governor Alexander Pimentel isip Regional Peace and Order Council Committee Chairman.
Si Alias Kakar kauban ang uban pang bag-ong surrenderees ipa-enrol sa Enhanced Local Integration Program kon E-CLIP diin daghang benipisyo ang madawat sama sa livelihood assistance, reintegration programs, og bayad sa armas nga gitahan niini.
