BUTUAN CITY – Nipasalig ang usa ka Good Conduct Time Allowance kon GCTA beneficiary sa iyang ka-andam nga musunod sa mamahimong desisyon sa kagamhanan kalabot na sa nagkaguliyang karon nga hisgutanan sa pagpatuman sa GCTA law.
Sa eksklusibong pakighinabi ning sibyahan kang Terencio Funesto, gipadayag niining nahatagan siya og kagawasan base na usab sa iyang gipadalang sulat-hangyo ning mi-aging tuig nga hatagan siya og Christmas executive clemency.
Gitubag usab kini sa pangulo rason nga giduso gilayon kini ngadto sa New Bilibid Prison lahos na ngadto sa hepe sa Board of Pardon and Parile diin gilantaw ang iyang records sulod sa prisuhan base ang GCTA.
Pagka-Hulyo 23, nakahukom matud pa ang BuCor nga ihatag kaniya ang gidamgong kagawasan nga nariyalisar pagkasunod adlaw.
Giklaro usab niini nga wala siya nadismaya sa dagan karon sa pagpatuman sa GCTA law bisan pa man nga namilegro siyang mabalik sa bilangguan human nga naahatagan og executive clemency gikan sa iyang sentensyang reclusion perpetua tungod sa kasong iyang gilambigitan.
Nitahan matod pa siya sa Butuan City Police Station kon BCPS4 tungod sa kabalaka sa gipakanaog nga ultimatum sa Pangulo, nga ang tanang gibuhian sa GCTA mu-report sa tanang PNP stations ug military detachment sulod sa 15 ka adlaw, kalabot na sa nigawas nga isyung “GCTA for sale”.
Alayon niini giawhag ni Funesto ang uban pang mga sama niyang gibuhian pinaagi sa GCTA nga musunod sa nakalatid sa balaod ug moreport ngadto sa pinakaduol nga Police Station.
