BUTUAN CITY – Padayon pang nakigbugno sa kamatayon ang usa ka magtutudlo human gipusil sa iyang bana kagahapon tungod lang sa selos didto sa ilang balay sa Purok 8, Brgy. Mailag, Valencia City, lalawigan sa Bukidnon. Naila ang biktimang si Ivylou Hesta-Tamulak samtang ang suspetsadong bana mao si Dodong Tamulak kinsa una matud pang mi-hostage sa ilang 7-anyos nga anak nga lalaki. Dinhi na nagpakitabang ang biktima sa ilang mga silingan.
Tungod sa kapaspas sa panghitabo, ulahi nang nasayran sa mga silingan nga gipusil na sa bana ang ulo sa iyang asawa dayong pusil sa iyang kaugalingon rason nga dali silang gidala sa ospital. Wala na maka-abot pang buhi sa ospital ang suspetsado samtang padayon pang gi-atiman sa mga doktor ang magtutudlo. Gika-ingong nagselos matud pa ang bana nga maoy rason sa ilang panaglalis nga misangpot sa duguong panghitabo.
