BUTUAN CITY- Mingsaka ang kabalaka sa mga mag-uuma human sa grabe nga pagsaka sa presyo sa produktong petrolyo kansa nagdala og sunod-sunod nga pagtaas sa tanang batakang palaliton ug galastuhon sa panguma.
Sumala ni Rubin Ragas, usa ka mag-uuma, nga bisan pa man og kasagaran na nga mosaka ang presyo sa merkado, lahi ra matud pa ang kasamtangang sitwasyon diin halos mi-abot na sa doble ang presyo sa gasolina, kansa nakaapekto dili lamang sa produksyon kundili lakip na usab sa suhol sa mga mamumuo ug uban pang panginahanglan sa uma.
Sigon pa niini, nga bisan og nisaka na daan og 20% ngadto sa 30% ang presyo sa mga gulay tungod sa miaging mga kalamidad sama sa pagbaha ug kakulang sa ani, nagpadayon gihapon ang pagsaka karon bisan walay bag-ong kalamidad, hinungdan sa dugang kabug-at sa kahimtang sa mga mag-uuma.
Gipasabot ni Ragas, nga dili nila mapantayan ang pagtaas sa gasto pinaagi sa pagdoble sa presyo sa ilang produkto tungod kay ang pagkaon usa ka batakang panginahanglan, maong nag-atubang sila karon og dako nga kapildihan ug kalisod sa pagbangon sa ilang panginabuhi.
