BUTUAN CITY – Nakig-alayon na ang kapulisan sa Cabadbaran City ngadto sa City Social Welfare and Development aron maturn-over na ngadto sa ginikanan ang usa ka minor-de-edad nga nag-viral human mitong-tong sa patrol car sa dihang kini gisikop.
Sa pakighinabi ning sibyahan kang Police Col. Rennel Serrano, hepe sa Cabadbaran City Police Station, giklaro niining lalaki ang maong indibidwal nga na-alaan lang og babaye tungod kay taas og buhok.
Saysay pa sa hepe nga nakadawat sila og reklamo gikan sa guwardiya sa usa ka mall mahitungod sa manglimos nga kung dili mahatagan, masuko og niadtong higayona dunay dalang kutsilyo rasong na-alarma ang mga tawo ilabina ang mga gagmay’ng negosyante sa lugar.
Sa pag-abot sa kapulisan, nahawiran na ang mga minor-de-edad og napasakay sa patrol car. Apan kalit kining migawas sa sakyanan og imbes nga modagan palayu, misaka na hinoon sa atop sa patrol car og misayaw pa.
Sigon ni Police Col. Serrano, daw sabog ang maong bata sa usa ka klase sa inhalants drugs og karun gikustudiya na sa Womens and Childrens Protection Desk sa Cabadbaran City police Station.
Nailhan na usab nila ang maong minor-de-edad nga matud pa taga Barangay La Union sakop sa maong siyudad rasong nakig-alayon na sila sa kapitan aron ila kining mauli ngadto sa ginikanan.
Nasayrang nakumpiska usab ang kutsilyo nga gidala-dala niini apan giklaro ni Police Col. Serrano nga dili kini pwedeng kasuhan base sa nakalatid sa Republic Act 9344 kon “Juvenile Justice and Welfare Act”.
