BUTUAN CITY – Mas gipalapdan karun ang hot pursuit operation sa kasundaluhan aron gukuron ang armadong grupo nga nag-ambush sa kasundaluhan nga nag-escort sa usa ka network nga nagpahigayon ug relief operation sa mga biktima sa linog sa Surigao City.
Sa pakighinabi ning sibyahan kang Lt. Col. Rico Amaro, commanding Officer sa 30th IB Philippine Army, nag-escort ang ilang kasundaluhan sa humanitarian mission nga gihimu sa ABS-CBN Sagip Kapamilya Foundation apan sa dihang pabalik na alas 8:30 kagabi-i, sa may Barangay Linongganan, San Francisco, Surigao Del Norte, gipaulanan kini ug bala.
Pagtoo pa ni Lt. Col. Amaro, ang armadong grupo sa committee front 16 sa New People’s Army kon NPA ang nagbuhat sa ingon tungod kay wala may laing grupo nga nag-operate sa maong lugar.
Hinoon walay natalang casualty o kaha samaran sa ilang han-ay.
Gikadismaya usab sa opisyal ang maong panghitabo tungod kay sila ra usab ang nagsupak sa ilang deklarasayong local ceasefire.
Apan sa inisyal nga pamahayag sa nagpailang Ka Otto sa NPA pinaagi sa gipadalang text meassage, gihimakak niini nga sila ang nagbuhat sa pagpang-ambush sa maong convoy.
