BUTUAN CITY – Mag-agbat sa usa ka exhibition fight karong Abril 25 ning tuiga sila Mike Tyson ug Floyd Mayweather Jr. didto sa Kinshasa, sa Democratic Republic of Congo.
Madumdumang sa Kinshasa gihimo ang makasaysayanong “Rumble in the Jungle” niadtong 1974 tali nila Muhammad Ali ug George Foreman alang sa heavyweight title.
Ang 59-anyos na karong si Tyson, adunay rekord nga 50 ka daog, 7 ka pildi ug 2 ka no contest ug ang iyang pinaka-ulahing away natigayon niadtong Nobyembre 15, 2024 batok kang Jake Paul, kondiin napildi siya pinaagi sa unanimous decision sulod sa walo ka round ug wala na siya makadaog sa opisyal nga away sukad niadtong 2003.
Samtang ang 48-anyos nga si Mayweather, wala pa mapildi ug adunay rekord nga 50-0 kondiin ang iyang pinaka-ulahing away, usa ka exhibition match batok kang John Gotti III niadtong Agosto 24, 2024.
Kini na ang ikawalong exhibition fight ni Mayweather sukad miretiro siya human mapildi si Conor McGregor niadtong 2017.
Unang gi-anunsyo ang ilang away niadtong Setyembre 2025 kondiin wala pa’y detalye niadtong panahona.
