BUTUAN CITY – Gipahamtangan og lifetime ban sa Maharlika Pilipinas Basketball League kon MPBL ingon man multa nga mu-abot sa ₱200,000 si Michole Sorela sa koponang GenSan Warriors human ang bayolenteng insidente atol sa ilang dula tali sa Mindoro Tamaraws niadtong Lunes, Agusto 11 sa Batangas City Coliseum.
Nasayrang atol sa third quarter sa dula, gisumbag ni Sorela sa nawong si Jonas Tibayan kinsa nakaposisyon alang sa iya untang birada.
Tungod sa maong hitabo, apektado ang utok ni Tibayan, duna pa siya’y broken jaw, nagisi pa ang wa-it, nalisa ang iyang bukton human natumba ug daling gidala ngadto sa New Era Hospital sa Manila.
Daling gikondena ni MPBL Commissioner Kenneth Duremdes ang mang hitabo dayong tawag niini nga pinakangil-ad nga nahitabo sa kasaysayan sabasketball.
Giklaro sa liga ang ilang zero-tolerance policy alang sa kagubot ilabina nga ang maong insidente, mikompromiso sa kaluwasan sa magdudula ug nakadamyos pa sa dungog sa liga.
Posible usab nga mag-atubang si Sorela ug pag-revoke sa iyang lisensya gikan sa Games and Amusements Board (GAB), nga maoy nagdumala sa professional sports sa Pilipinas.
Ang ₱200,000 nga multa mao ang pinakadako nga gipatuman sa kasaysayan sa MPBL human niini nalabwan ang ₱100,000 nga multang gipahamtang kang Germy Mahinay ning mi-aging tuig 2024 tungod sa susamang taras.
