BUTUAN CITY – Gitawag nga fake news ni Atty. Ernie Palanan, Provincial Election Supervisor sa Comelec-Agusan Del Sur ang mibaniog sa probinsiya nga gamiton sa impeachment batuk kang Vice President Sara Duterte ang mikatag nga form nga fill-apan sa mga botante.
Nasayrang dunay mga nagtoong gamiton sa impeachment sa Besi Presidente ang kalihukan karun sa Comelec diin dunay gipanghatag nga Voter Information Sheet kon VIS unya dunay papirmahan human nila kini madawat.
Gipasabot pa ni Atty. Palanan nga ang Voter Information Sheet sama sa sample ballot nga ipanghatag sa mga kandidato. Sayu matud pa nila kining gipanghatag ngadto sa tanang mga botante aron duna silay ka-praktisan sa pagbotar aron mas dali na unya pag-abot sa adlaw sa piniliay.
Samtang ang gipapirmahan nga porma, pamatood matud pang nadawat na niini ang maong Voter Information Sheet og wala kini kalabutan sa pulitika.
Miabot na matud pa kini sa iyang kahibalo og gane dunay usa ka barangay kagawad nga giuli gyud ang VIS tungod sa sayup nga impormasyong nadawat nga ang pormang gipa-fill-apan gamiton sa impeachment kang Vice President Sara Duterte butang nga hugot nga gihimakak sa opisyal.
Si Atty. Ernie Palanan, Provincial Election Supervisor sa Comelec-Agusan Del Sur.
