BUTUAN CITY – Padayon karun ang pagpanubay sa mga ginsakpan sa Criminal Investigation and Detection Group kon CIDG-Caraga sa mga warehouse ning rehiyon nga gihimu ug bagsakanan sa mga peke nga segarilyo.
Sumala pa ni P/ Chief Insp. Eugene Balugo sa CIDG-Caraga, nga kung makakuha sila ug lig-ong ebidensiya batuk sa mga warehouses nga gihimu ug bagsakanan sa mga peke nga segarilyo, gelayon silang mag-isyu ug search warrant batuk sa tag-iya niini.
Dugang pa sa opisyal nga nagsugod ang ilang operasyon kontra peke nga segarilyo, sa may Cabadbaran City diin gipanubayan ang mga pekeng produkto hangtud nga miabot sila sa Cagayan de oro City diin atua nahimutang ang paktorya.
Sa gihimung raid, gibana-banang muabot sa 800 milyones pesos ang kantidad sa nakumpiskang paktorya, machine, mga pekeng segarilyo ug tax stamps.
Pagbutyag pa ni P/ Chief Insp. Balugo nga base sa ilang nakuhang impormasyon, mga chinese nationals ang nanag-iya sa maong paktorya, apan wala kini na-abtan sa otoridad.
