BUTUAN CITY – Gisugdan na kagabii sa lokal nga kagamhanan ning siyudad sa Butuan ang pagpang-apod apod og food packs ngadto sa mga stall owners ug vendors nga apektado sa gi-lockdown sa unom ka adlaw nga Langihan Public Market.
Sa eksklusibong pakighinabi sa Bombo Radyo Butuan, gipadayag ni Butuan City government spokesperson Michiko de Jesus nga ang maong food packs mulungtad og usa ka semana kon pito ka mga adlaw kansa igo-igo na nga makasapal-sapal sa ilang inadlaw nga panginahanglanon.
Giklaro pa sa opisyal nga tumong sa gipatumang temporaryong total lockdown nga mag-house quarantine ang maong mga vendors ug mga stall owners apan nasutang padayong namaligya sa mga sidewalks atbang sa maong merkado.
Alayon niini, gitambagan sila ni de Jesus nga kinahanglang anaa lang sa balay aron paghatud sa mga food packs, ila kining madawat.
Sa ilang pagpanubay base sa gihimong rapid test, gibana-banang anaa sa 1,800 ang mga apektado sa market lockdown. Apan padayon pa kining gi-validate sa taga-merkado aron makuha ang kinatibuk-ang lehitimong makadawat sa food packs.
Kini usab ang rason nga dili pa niya mabutyag kung pila na ang nahatagan ilabina nga gipadayon pa nila kini karong adlawa uban sa taga-City Social Welfare and Development kon CSWD.
