BUTUAN CITY – Isyuhan og show cause order sa Business Permits and Licensing Division kon BPLD sa Butuan City Hall ang mga occupants sa Salvador Calo Public Market kon mas nailang Langihan Public Market tungod sa pagsubmite og mga peke nga rapid test results ngadto sa Office of the City Economic Enterprise kon OCEE aron lang makapamaligya ug maka-display na human gi-isolate.
Kini ang giklaro ni Atty. Moshie Ariel Cahoy sa BPLD human nakumpirma ang maong modus nga gilambigitan sa dul-an 30 ka mga market vendors ug stall owners.
Sa eksklusibong pakighinabi sa Bombo Radyo Butuan, gipadayag ni Atty. Cahoy nga nakig-alayon kanila ang kadumalahan sa OCEE pagpanguna ni Atty. John Pizarro aron klaruhon ug ma-validate gikan sa mga diagnostic centers ug laboratories ang authenticity sa maong mga rapid test results.
Nagsubmite matud pa sila og kopya sa maong mga resulta sa nakapangalan nga mga centers og laboratoryo sa mga rapid test results ug dinhi nasuta nga peke kini.
Tungod niini, mamahimo matud pang pasakaan og kasong kriminal ang maong mga market occupants ingon man posibleng pagkansela sa ilang gipanag-iyahang stall o kaha business permit tugod kay dakong salaud sa lokal nga kagamhanan ang ilang gihimo.
