BUTUAN CITY – Daghan pa gihapong mga vendors ang namaligya kaganinang kaadlawon sa gawas nga bahin sa Mayor Salvador L. Calo Supermarket kon mas nailang Langihan Public Market taliwa nga balik-operasyon na kini kaganina human ang walo ka adlaw nga pag-lockdown niini.
Sa gihimong contact tracing, mukabat sa 323 ka mga market occupants ang inisyal nga na-trace nga duna’y close contacts sa mga kumpirmadong kaso sa COVID-19 sa maong merkado.
Sa maong ihap, 60 ang nagpositibo sa Rapid Diagnostic Test ug 27 ang nagpositibo sa RT-PCR kon swab test.
Subay sa pagbukas sa maong merkado, ang mga vendors ug stall owners nga wala’y “close contacts” sa mgfa COVID-19 positive sulod sa merkado, mamahimo nang mobalik sa pagtinda basta mosunod lang sa mga sumbanan.
Apil niini ang pagbaton og duha lang ka bantay sa kada-tindahan; alternate ang pag-abri sa mga tindahan; magsuot og face shield ug face mask ang mamaligya ug ang mamalit samtang ang vendor ug stall owner, kinahanglang musubmite og Negative Rapid Diagnostic Test Result adiser ang pagtinda og balik.
Giklaro sa city government nga libre ang Rapid Diagnostic Test ug RT-PCR (swab) Test sa LGU apan unahon usa ang mga close contacts sa pag test.
Mamahimong maghuwat ang mga vendors hangtod mahuman og test ang tanang close contacts sa merkado aron makalibre sila sa test, pwede usab sila magpa-test sa mga private hospitals ug clinics aron makabalik sila sa pagtinda sa labing daling panahon.
Apan ang gikabalak-an sa tanan mao ng pagtapok gihapon sa mga vendors ug mga mamalitay gawas sa merkado tungod kay wala’y kasiguruhan kung luwas ba ang mga vendors gikan sa makamatay nga coronavirus ilabina nga wala sila’y bitbit nga negative result sa rapid ug swab tests.
