BUTUAN CITY – Gikalipay sa mga magtutudlo ang taho ni Pangulong Ferdinand ‘Bongbong’ Marcos Jr. atol sa iyang State of the Nation Address kon SONA kagahapon nga wala na matud pa’y mga magtutudlo nga muretirong nagpabilin lamang isip Teacher I.
Sumala ni Pedro Tecson, tigpamaba sa Department of Education kon DepEd-Caraga, nalipay ang mga magtutudlo sa saad sa presidente nga makadawat sila og mga insentibo, personal accident insurance, allowances, ug ang pagwagtang na sa ‘utang tagging’ nga nahimong babag sulod sa pipila ka tuig, alang sa pag-renew ang ilang lisensya bisag duna sila’y dagkong utang.
Gikalipay usab nila ang plano nga mamahimo nang ma-abot sa mga magtutudlo ang teacher 7 level kondiin bisan og nagtudlo lamang sa classroom ang usa ka magtutudlo, magdawat gihapon kini og dakong sweldo nga halos tupong na sa supervisor.
