BUTUAN CITY – Gipatuman na sa tanang mga Local Disaster Risk Reduction and Management Councils sa Agusan del Norte sugod kaganinang alas-singko sa hapon, adlaw’ng Dominggo, ang pre-emptive evacuation sa mga high-risk areas isip paagpangandam sa mga posibleng matigayong pagbaha ug pagdahili sa yuta.
Nakalatid kini sa gipagawas nga Executive Order No. 7-2021 ni Governor Dale Corvera kansa nagpataas sa alert status sa Emergency Operations Center sa PDRRMC ngadto sa code red.
Alayon niini, kinahanglang ang tanang mga Agusanons nga nagpuyo sa mga landslides ug flood-prone areas, mamakwit na.
Naka-alerto na sukad pa ning mi-aging adlaw ang tanang 31 ka mga barangay sa Cabadbaran City sakop sa Agusan del Norte tungod sa hulgang hatud sa bagyong Auring.
Sa eksklusibong pakighinabi sa Bombo Radyo Butuan, gipadayag ni Rosely Exaure, tigpamaba sa Cabadbaran City government, alerto na usab ang mga sakop sa City DRRMO aron maoy muresponde sa mga posibleng emerhensyang magapanghitabo.
Naka-preposition na usab ang mga national-line agencies nga gitahasan pagtabang sa mga ma-apekuhan sa kalamidad ilabina sa pagpanghatag og mga ayuda.
Nanghinaut si Exaure nga makatala ang ilang siyudad og zero casualty niining pagkuso-kuso sa bagyong Auring.
