BUTUAN CITY – Maghulat lang ang mga supporters ni Vice President Sara Duterte nga atua sa kauluhan kung unsay masabutan alang sa sunod nga himoong lakang human sa gihimong prayer rally ning mi-aging gabii.
Sigon ni Engr. Juric Gavino, secretary General sa Sara All Movement, posibleng duna pa silay himoong prayer rally human ang malinawon nilang gihimo ning mi-aging gabii. Sumala pa ni Gavino, mu-adto gayud sila sa Manila aron ipakita ang suporta sa besi presidente.
Daghang mga butang ang gikadismaya sa grupo tungod sa wala man lang pagrespeto sa ikaduha sa pinakadakong opisyal sa Pilipinas. Lakip na niini ang pagputol sa linya sa kuryente sa mga opisina sa kongresista sa House of representatives bisan og nag-istar si Vice President Sara Duterte sa opisina sa iyang igsoon nga si Congressman Paolo Duterte.
Sumala pa ni Gavino, girespeto nila ang maong patakaran nga palongon ang linya sa kuryente atol sa dies oras sa kagabhion aron makadaginot apan gikonsedera unta nila nga dunay tawo sa maong opisina.
