BUTUAN CITY – Giklaro ni Agusan del Norte – Police Provincial director PCol. Martin Gamba nga apil na ang mga buwangan sa mga gitugutan sa National Task Force Against COVID-19 nga mag-operate apan kinahanglan gihapong mag-obserba sa mga health protocols ang manulod dinhi.
Subay kini sa mga nakita niya sa mga posts ning mi-aging semana nga wala magsuot og face mask ug wala mag-obserba og social distancing ang mga sabungero.
Sa eksklusibong pakighinabi sa Bombo Radyo Butuan, gipadayag sa opisyal nga aron masigurong masunod ang mga health protocols, kinahangang magtambayayong ang mga local government units, kapulisan ingon man ang management sa buwangan aron mamintina ang gitugutan lang nga 50-porsientong kapasidad sa matag-buwangan.
Nagbahad kini nga kung dili gyod masunod ang mga health protocols, mamahimong irekomenda ang pagkansela sa ilang business permit.
