BUTUAN CITY- Walay supak matod pa si Barobo, Surigao Del Sur Mayor Ronnie Martizano sa panginabuhian sa mga residente nga dugay na nga namulawan gamit ang pagpamiring ug wala mogamit sa large scale equipment.
Gani gibutyag niini nga aron masuportahan ang mga gagmayng panginabuhian duna na silay giproseso nga Minahan Ng Bayan aron legal kini nga manginabuhi.
Gipasabot sa Mayor nga kinahanglanon na gyud nga plastaron ang kahimtang sa pagmina sa lungsod sa Barobo aron ma protektahan ang lungsod ug katawhan batok sa dakong kadaot. Sumala ni Mayor Martizano, nga kung dunay sakto nga monitoring malikayan ang mga kadaot sa kinaiyahan og matagaan pa sa kahigayonan ang mga residente nga diha sila nabuhi sa pagpamiring.
Supak lamang matod pa kini sa mga migamit sa illegal large scale mining o paggamit sa dagkong ekwepo gumikan kay nakahimo kini sa pagkaguba sa mga lugar diin human gigamit napasagdan na.
Gimanduan na usab sa Mayor ang buhatan sa Municipal Environment and Natural Resources Office kon MENRO sa lungsod nga molihok kini alang sa pag validate ug monitoring sa kinaiyahan aron kini maplastar.
