BUTUAN CITY – Wala nahulga ang walhong grupo sa New People’s Army ( NPA ) dinhi sa rehiyon sa Caraga subay sa mga gibutyag ni Pangulong Rodrigo Duterte atol sa iyang ikaduhang State of the Nation Address ( SONA ) ning miaging adlaw.
Sa pakighinabi ning sibyahan, gibutyag sa nagpailang si Ka Oto, tigpamaba sa NPA’s Guerilla Front Committee 16, nga wala matud pa sila nahulga sa deklarasyon sa Pangulo nga all-out-war batuk kanila human nga gipahunong una ang hisgutanang pangkalinaw.
Sigon niini nga tin-aw matud pa ang ilang baruganan nga ang demokratikong rebolusyon sa katawhan maoy nag-unang sulbad sa nagtunhay nga problema sa nasud.
Matud pa nga dili gyud masulbad ang problema sa nasud kung dili maningkamot ang gobyerno sa pag-ugkat sa ugat-hinungdan sa armadong pagsukol sa katawhang Filipino.
Gidugang pa niini nga wala usab sila malipay sa gihimong pag-insulto ni Pangulong Duterte ngadto na sa ilang founder nga si Jose Maria Sison.
Angayan matud pa nga sensiro ang gobyerno diha sa negosasyon ug dili ang interest lamang sa nagharing hut-ong maoy ipatigbabaw.
Gitin-aw usab niini nga adunay nagtunhay nga civil war karon sa nasud tali sa rebolusyunaryong gobyerno ug sa gobyerno sa nagharing hut-ong maoy rason nga angayan na gyud unta nga paspasan ang hisgutanang pangkalinaw ug dili ihunong. (Mon Aplaya)
