BUTUAN CITY – Nagdugang og pwersa ang Butuan City Police Office kon BCPO alang sa pagmintina sa kahapsay ug kalinaw ning siyudad karong mas gipahugtan pa ang pagpatuman sa general community quarantine.
Sa eksklusibong pakighinabi sa Bombo Radyo Butuan, gibutyag ni PLt. Abel Bulawan – tigpamaba sa maong buhatan, kini ang hinungdan nga nagbutang sila og mga pulis diha sa kadalanan ilabina nga daghan na ang nanggawas nga mga tawo bisan og dili pa nila eskedyol nga manggawas, base na usab sa gi-isyu kanilang home quarantine pass.
Dugang pa sa opisyal nga epekitibo pa gihapon ang hangtud karon ang color-coding sa mga home quarantine pass rason nga ang masapong migawas sa ilang balay taliwa nga dili pa nila eskedyol rason sa pagsaka karon sa ihap sa ilang mga nadakpang milapas niini nga mi-abot sa 805 apil na sa ubang mga protocols.
Apan ang maong ihap dili tanan nadetine sa mga police stations diin nasakop ang lugar diin sila nadakpan samtang ang uban nga nakasuhan na, nakapyansa na samtang ang kadtong kinahanglanpang warningan, ilang gipapa-uli.
Aminado ang opisyal nga midaghan ang ihap sa ilang mga nadakpang violators tungod sa pagtuo nilang dili na sila dakpon human milapas sa mga quarantine protocols sama sa dili na pagpa-backride sa motorsiklo, wala pag-obserba sa social distancing ug wala pagsuot og face mask apil na ang paglapas sa liqour ban.
Padayon usab ang ilang monitoring sa mga tindahang namaligya og ilimnong makahubog ilabina sa mga lagyong barangay.
Kini ilabina human nasayran nga ubay-ubay sa mga nakadawat og cash aid gikan sa Social Amelioration Program, ang namalit usab og mga ilimnong makahubog inay nga ipamalit unta sa nag-una nilang panginahanglanon alang karong quarantine period.
