BUTUAN CITY – Nagpagawas og abiso ang Department of Foreign Affairs (DFA) alang sa mga Pilipinong nurses nga nangita og trabaho sa New Zealand nga mag-amping tungod kay wala’y gihanyag nga trabaho ang maong nasud alang sa foreign nurses o Internationally Qualified Nurses (IQNs).
Naggikan kini nga pahimangno sa embahada sa Pilipinas sa Wellington, New Zealand human nasayrang duna’y pipila ka mga indibidwal ug mga agencies nga naghanyag ug nag-facilitate og hiring sa langyaw’ng nurses pinaai sa pag-facilitate sa ilang biyahe padulong sa New Zealand gamit ang visitor visa aron makakuha og Comprehensive Assessment Program (CAP) o Objective Structured Clinical Examination (OSCE).
Bisan matud pa og lihitimong proseso ang pagkuha og examinasyon aron maka-practice og nursing sa New Zealand, dili matud pa kini garantiya sa trabaho tungod kay mag-agad gihapon kini sa nagkada-iyang factors sama sa local demand alang sa nurses ug sa abilidad sa mga employers sa health sector nga mag-hire.
