BUTUAN CITY- Gikumpirma sa Embahada sa Pilipinas sa Doha, Qatar nga dunay mga Pilipino ang giaresto ug gipriso sa nasangpit nga Arab country tungod sa dili awtorisadong pagpahigayon og political demonstrations kagahapong adlawa, Biyernes, Marso 28.
Sa usa ka pamahayag, gibutyag sa Embahada nga nakig-alayon na kini sa mga lokal nga otoridad sa Qatar para maghatag og tukmang tabang alang sa nasangpit nga mga Pilipino.
Wala na usab gibutyag pa sa Embahada kung dunay kalabutan kini sa halapad nga protesta nga gihimo dungan sa ika-80 nga adlaw’ng natawhan ni kanhe Pangulong Rodrigo Duterte kagahapong adlawa.
Subli usab nga gipa-ambit sa Embahada ang una na niining gipahimangnoan ang tanang katawhang Pilipino nga anaa sa Qatar nga musunod sa mga patakaran sa nasangpit nga nasud mahitungod sa pagpahigayon og mga pagpulong ug lihok protesta nga dunay temang politikal.
