BUTUAN CITY – Tumang kalipay ang gibati sa 314 ka mga pamilya sa Brgy. A. Beltran sakop sa lungsod sa Jabonga, Agusan del Norte human nadawat kagahapong adlawa ang 25-kilos kon tunga sa sakong bugas.
Kini ang ikaduhang hugna sa ayudang gitunol sa lokal nga kagamhanan sa maong mga residente human ang unang pagpang-apod apod nga gihimo ngadto sa 148 ka mga pamilya usab sa Brgy. Maraiging niadtong Dominggo, Abril 26.
Giklaro sa Task Force COVID nga na-apuran niini ang tanan nilang mga barangay aron wala na’y rason nga manggawas ang mga tawo sa ilang pinuy-anan kay mangita og ipakaon sa ilang pamilya.
Hapsay ang distribusyon sa tagtunga sa sakong bugas tungod kay gihimo kini samtang gi-obserba ang social distancing isip pagsunod sa usa sa mga protocol sa enhanced community quarantine kon ECQ nga mugna sa COVID-19 pandemic.
