BUTUAN CITY – Dili makatuo ang mga residente sa Caraga Region sa nakuhang mga higanteng nukos nga nabingwitan sa usa ka mangingisda sa Brgy. Bunyasan, lungsod sa Malimono, Surigao del Norte kagahapon.
Ang pipila ka mga nukos nga mutimbang og tag-dies kilos, nakuha sa kalawran sa mananagat nga si Ronniel Canales.
Sigon ni Geraldine Fuentes Lorenzana, nakurat na lang siya dihang sa iyang pagbisita sa iyang iyaan sa maong barangay, iyang naabtan nga gihaw-as gikan sa baruto ni Canales ang mga higanteng nukos.
Tungod sa kadagko og kapresko pa niini, ila kining gitilawan pinaagi sa pagkilaw sa mga tentacles kon mga gaway niini samtang nagsabaw og nag-adobo usab sila sa lawas niini.
Sa saysay ni Canales, migamit matud pa siya og dagkong kubit og squid fins isip pa-on dungan sa pagbutyag nga kini na ang ikatulong higayon nga nakabingwit siya og ingon niini kadagkong mga nukos sa kadagatan sa Malimono. (Beth Ruiz)
