BUTUAN CITY – Aprubado na sa Sangguniang Panlungsod ning dakbayan sa Butuan ang gidusong resolusyon sa Legal Office sa City Permits and Licensing Division nga maghatag og usa ka tuig nga moratorium aron ma-comply sa mga negosyante ang ilang mga rekisitos alang sa pagkuha og occupancy permit.
Sa eksklusibong pakighinabi sa Bombo Radyo Butuan, gipadayag ni Division Legal Officer Atty. Moshi Ariel Cahoy, nga ang pag-isyu og occupancy permit base sa nakalatid sa National Building Code, maoy pruweba nga luwas nang gamiton ang usa ka dakbalay.
Aron ma-isyuhan matud pa og occupancy permit, kinahanglan lang nga mag-execute ang mga apektadong negosyante og affidavit of undertaking aron padayon nga maka-operate sa ilang negosyo samtang padayon ang pagkompleto sa uban pang mga kinahanglanong dokumento.
Gipasabot pa ni Atty. Cahoy nga duna’y mga negosyanteng wala pa nahatagan og occupancy permit sukad niadtong 2009 pataas tungod matud pa sa adjustment ug corrections nga ilang gihimo masunod lang ang National Building Code subay na sa kamanduan ni Pangulong Rodrigo Duterte alang sa siguridad sa mga musulod nga tawo sa mga concerned establishments.
Dili matubag sa opisyal ang pangutana ning sibyahan kalabot sa paspas nga pagbalik sa operasyon sa ubang establisamiento human na-isyuhan og cease and desist order.
Ang iya lang giklaro nga andam silang mu-assist sa mga negosyanteng mudangop sa ilang buhatan subay sa maong problema.
