BUTUAN CITY – Mipasilong na sa mga evacuation centers ang mga pamilyang apektado sa pagbaha nonot usab sa padayong pagbundak sa ulan nga hatud sa Low Pressure Area kon LPA sa Agusan Del Sur.
Sa inisyal palang nga nakuhang impormasyon, muabot na sa 73 ka mga pamilya kon bugti sa 348 ka indibidwal ang anaa karun sa Municipal Gymnasium sa Trento, Agusan Del Sur kansa namakwit tungod sa kadako sa tubig sa Bahayan River.
Hinoon mapasalamaton si Barangay Poblacion Kapitana Doreen Marte sa mga mitunol na og hinanaling tabang sa mga namakwit niyang residente sama sa mga senina og pagkaon.
Samtang duna pay gitoohan nga na-estranded sa ilang mga panimalay tungod kay dili na kaagi ang rescue team sa kataas sa tubig sa pipila ka barangay sa maong lungsod ilabina sa Barangay Sta. Maria.
Sa karun padayon ang monitoring usab sa mga lokal nga opisyales dayung panghinaot nga moundang na ang pagbundak sa ulan.
Samtang dunay na-anod na usab nga mga bong-bong sa panimalay sa may Barangay Libertad, Bunawan, Agusan Del Sur human misulod na sa panimalay ang tubig-baha. Kini ang senaryo usab sa Barangay Hubang sa susamang lungsod.
Sa Agusan Del Norte, padayon usab nga gimonitor ang suba sa Barangay Jaguimitan. Nasipita Agusan del Norte tungod sa kadako na sa baha.
Sa impormasyong nakuha gikan ni Barangay Culit Kapitan Joel Pepito, binuntagay niyang gimonitor ang Sitio Sumagayad human usab misibaw ang tubig ngadto na sa kabalayan. Sumala pa niini nga tungod sa mga kahoy ug pinutol nga mga kawayan nga nibara sa spillway rasong misibaw ang tubig.
Sa karun gipanghinaot nalang nga moundang na ang ulan aron mohinay-hinay na ang tubig baha.
