BUTUAN CITY – Gipaniguro sa buhatan sa Police Regional Office kon PRO 13 nga manubag ang bisan si kinsang indibidwal nga mapatud-ang mihimo og pagnalipod sa pagtago-tago ni Kabus Padatoon kon KAPA Community Ministry International Inc. founder Joel Apolinario.
Sa pakighinabi sa Bombo Radyo Butuan gibutyag ni PMaj. Renel Serrano, Public Information Officer sa PRO13 nga sa gimugnang Special Task group, nga magimbestigar sa ubang board of directors sa KAPA ug pag-facilitate sa mga reklamo nga ipasaka sa mga nabiktima sa nasangpit nga investment scam sakop usab niini ang tahas sa pagsuta sa mga nagpaluyo o nagpanalipod sa mga gipangita sa balaod labi na sa kaso ni Apolinario.
Sigon ni Serrano posibleng manubag usab ang tag-iya ug nagbaligya sa yuta labi na sa gitarokang mansyon ni Apolinario sa Sitio Dahican, Brgy. Salvacion lungsod sa Lingig, Surigao del Sur.
Lantawon na usab ang elemento sa krimen sa mga indibidwal nga nag-facilitate aron makahimo og lungga si Apolinario ug ugaling mapatud-an o mo-qualify ang mga niini ang PNP na mismo ang mahimong dominal complainant o unang magpasaka og kaso.
Gi-awhag usab sa opisyal ang mga nabiktima nga mibubo og kwarta sa nasangpit nga investment scam nga dili magduha-duhang magpasaka og pormal reklamo batok kang Joel Apolinario alang sa kasong sydicated stafa aron dili na na kini makagawas pa.
Sigon usab ni PMaj. Serrano mamahimo lamang moduol ang mga reklamante sa mga police station sa ilang lugar ug didto na inconsolidate aron usahaon ang pagpresentar niini sa korte dungan sa pagpadayag nga kung mas daghang reklamo mas bug-at nga kaso ang atubangon ni Apolinario.
