BUTUAN CITY – Mupasaka og kasong estafa ang lokal nga kagamhanan sa Socorro, Surigao del Norte batuk sa mga nagdumala sa Maharlika Nation nga maoy nagpagawas sa karensiyang Golden Zion kon G-Zion. Kini tungod sa komosyong mugna niini tungod sa pagpanghatag nila sa maong karensiya nga duna’y bugting 200-pesos kada-usa.
Sa eksklusibong pakighinabi sa Bombo Radyo Butuan, gipadayag ni Socorro Mayor Felizardo Galaneda, nga ang ilang gipalagan mao ang pagpahibalo sa Maharlika Nation nga ang gipang-apod apod nga currency sa grupo. duna matud pa’y bugti nga gold bar nga makuha nila higayong mapunduhan na.
Kini matud pa ang hinungdan nga apil sa midugok sa ilang lungsod ang mga taga-Davao Region, North ug South Cotabato, Lanao provinces, apil na ang pipila ka lalawigan sa Visayas area. Gani duna pa’y gikan sa Polomolok, South Cotabato nga nagmotor lang aron lang makakuha sa maong karensiya nga iyang gikadismaya.
Base matud pa sa iyang nadawat nga impormasyon, duna’y pipila ka membrong nagsulti kaniya nga duna’y membership fee ang magpamembro sa Maharlika Nation samtang duna usa’y uban nga nagsulting wala kini’y bayad.
Tungod niini, kanunay ang ilang panhimangno sa katawhan sa nagkada-iyang probinsya nga dili mutuo sa gipasi-atab sa Maharlika Nation. Nanawagan ang mayor ngadto sa tanang mga na-ilad sa Maharlika Nation nga dili na mudagsa pa sa ilang island municipality tungod kay wala’y balor ang gikagubtan nila pag-claim nga Golden Zion kon G-Zion currency.
