BUTUAN CITY – Gibalik na usab sa lokal nga kanggamhanan sa Butuan City ang pag-require og negative result sa RT-PCR o Rapid Antigen test sa mga indibidwal nga gikan sa gawas sa Caraga Region adiser makasulod sa syudad.
Sa pakighinabi sa Bombo Radyo Butuan, gipadayag ni Michiko de Jesus, tigpamaba sa Butuan City-LGU nga ang maong lakang, nakab-ot subay sa amendment nga nakalatid sa Executive Order No.11 nga gipagawas ni Mayor Ronnie Vicente Lagada alang sa buwan sa Abril 1 hantod 30, aron maprotektahan ang syudad human ang natalang paspas nga pagsaka sa mga kaso COVID-19 ingon man pagkapuno sa mga pasyente sa kadaghanang ospital sa tibuok nasud labi na sa kauluhan.
Gipasabot ni De Jesus nga kadtong anaa sa gawas sa Caraga lamang nga gustong mosulod sa Butuan ang obligadong magpakita og negatibong resulta sa RT-PCR or Rapid Antigen nga balido sulod sa lima adlaw.
Kung pakyas nga makapakita niini ang byahidor, dili kini pasakyon sa mga bus, eroplano ug uban pang sakyanan nga mubyahe padulong ning syudad.
Gidugang pa sa opisyal nga wala’y kabalak-an ang mga tawo nga ania lang sulod sa rehiyon tungod kay makasulod gihapon sila sa siyudad basta magdala lamang og valid ID.
