BUTUAN CITY – Personal nga gi-award ni PBGen Gilberto DC Cruz – regional director sa Police Regional Office kon PRO-13, ang sinakong bugas ug salaping cash isip reward ngadto sa mga mangingisdang nakakaplag sa binandol nga cocaine sa baybayon sa Dinagat Islands province.
Natigayon ang awarding dungan sa blessing og turn-over ceremony sa Dinagat Islands Police Provincial Office nga nahimutang sa Camp Local Hero Euben B. Ecleo Sr. sa Sitio Ering-Ering, Brgy. Wilson, lungsod sa San Jose.
Mahinumdumang nakaplagan sa mangingisdang si Gonie Curada, ang 36 ka bricks sa cocaine sa probinsya sa Dinagat Islands niadtong Pebrero 12 sa baybayon sa Sitio Habongan, Barangay Poblacion, lungsod sa Cagdianao.
Sa gihimong awarding personal nga ni-claim si Curada sa iyang reward samtang ang uban girepresentahan lang sa mga Barangay Officials.
Samtang niadtong April 23, nakarekober usab ang upat ka mangingisda nga sila Clyde Cabe, Benito Cabantoc, Clark Cabe og Joselito Balbuena, ug 7 ka bricks sa cocaine nga naglutaw sa dagat sakop sa Brgy Helene, Loreto; April 24, nakakaplag usab si Jovie Cabantoc, ug brick sa cocaine sa Sitio Pinamatayan, Brgy Helene, Gibusong Island, Loreto.
Sumala kang PBGEN Cruz, ang subsob nga kampanya sa police unit nga “usa ka sako sa bugas bugti sa usa ka brick sa cocaine” nagmalampuson tungod sa positibong pagtubag sa komunidad pinaagi sa paspas nga pag turn-over sa mapalgang cocaine sa ilang lugar.
Alayon niini nagpasidaan ang PRO13 ngadto sa Caraganons nga nanimuyo kilid sa baybayon nga magpabiling alerto ug i-report gilayon ngadto sa otoridad ang kadudahang butang nga mapadpad sa baybay o naglutaw sa kadagatan.
