BUTUAN CITY – Gipasalig ni Ozamiz City Police Chief Insp. Jovie Espenido nga wala’y matigayong vote buying sa iyang area of responsibility samtang siya pa ang hepe sa kapulisan sa maong siyudad.
Gibutyag sa opisyal nga uban sa pag-abag sa Ginoo, paningkamutan niyang mapahigayon nga hapsay og malinawon ang eleksyon sa ilang siyudad og dili hatagan og lugar ang pagpanghuraw sa mga botante.
Gibutyag sa opisyal nga panggisi-on niya ang dagway sa mga tawo ilabina sa mga pulitikong mamalit og mga boto aron lang matuman ang iyang tinguha alang sa hapsay nga botohay.
Nanawagan siya sa tanan nga mi-adaptar pa sa na-andan nang pagpamalit og mga boto, pagpanghuraw og paggamit sa kwartang gikan sa ilegal nga kalihukan nga muhunong na aron dili magabaan.
Nanawagan usab siya sa mga mayor og gobernador nga dili manginlabot sa maong eleksyon og pasagdan na ang mga botanteng makapili sa gusto nilang botaran. (Beth Ruiz)
