BUTUAN CITY – Ipa-ilalom sa paraffin test ang usa ka abogado kinsa gireklamong nagpabuto sa iyang armas kagahapon sa alas 12:30 ang takna sa udto sa may Purok-6, Barangay Tagabaka, ning siyudad sa Butuan.
Gi-ila ni P/Chief Insp. Ephraim Detoya, hepe sa Butuan City Police Station kon BCPS-4 ang suspek nga si Atty. Rolando Gualbert Salise, usa ka private practitioner.
Base sa pakisusi sa kapulisan, miadtu matud pa ang abogado sa basakan sa Brgy. Tagabaca diin dunay mga mag-uuma ang nani-udto dayong papahawa kanila ug kalit nga nagpabuto sa iyang dalang 9mm nga pistola.
Dili ti-aw nga kahadlok ug nerbiyos ang gibati sa mga maguuma nga mikaratil ug dagan og nagpa-abot gilayon ug reklamo sa kapulisan.
Gipadayag usab sa hepe nga dunay laing kaso nga gi-andam ang naka-kontrata sa maong trabaho human mi-abot sa ilang buhatan.
Gi-awhag na lang sa opisyal ang mga reklamante nga dili mahadlok sa pagpasaka ug kaso batuk sa maong abogado dungan sa pagklaro nga walay gipili ang balaod.
Sumala ni P/Chief Insp. Detuya, gikuhaan na usab niya affidavit ang mga reklamante nga gipangunahan sa usa ka Danny Batucan. (Rolan Janea)
