BUTUAN CITY – Nagpagawas na og yellow rainfall warning ang PAGASA alang sa mga lalawigan sa Dinagat Islands ug Surigao del Norte, rason nga posible ang matigayong mga pagbaha sa mga ubos nga lugar ug pagdahili sa yuta kilid sa kabukiran.
Alayon niini, gitambagan ang publiko ug ang mga Local Disaster Risk Reduction and Management Councils kon PDRRMC sa posibleng katalagmang ilang masinatian rason sa pagpahan-ay na sa ilang mga himuong lakang ug i-monitor ang kahimtang sa panahon.
Sa Dinagat Islands province, tulo ka adlaw nang andam ang probinsyal nga panggamhanan pagpanguna sa ilang Provincial Disaster Risk Reduction and Management Office kon PDRRMO alang sa pag-landfall na unya sa bagyong Auring.
Sa eksklusibong pakighinabi sa Bombo Radyo Butuan, gibutyag ni Vice Governor Nilo Demery nga naka-preposition na usab ang ilang mga ekwepo aron maoy muresponde higayong duna’y matigayong landslides o mga pagbaha.
Nagpatuman na usab sila og forced evacuation alang sa mga residenteng anaa sa landslides ug flood-prone areas.
Dugang pa ni Vice-Governor Demery, kagahapon pa ang hugot nilang gihimong monitoring tungod sa pagkusog sa huros sa hangin ug ulan apil na ang pagdagko sa balud rason nga gi-advise sa Philippine Coast Guard ang paghunong na sa biyahe diha sa kadagatan ilabina sa mga gagmay’ng sakyanang pangisda.
Base sa iyang gihimong monitoring kaganina sa mga lungsod sa Loreto, Cagdianao ug Libjo nga nag-atubang sa Pacific Ocean, mihinay matud pa ang huros sa hangin apil na ang pagminos na sa balud sa kadagatan gawas lang sa ginagmay nga pag-ulan.
Bisan pa man niini, dili sila mukumpyansa tungod sa posibilidad nga nagtigom lang kini og kusog adiser ang pag-landfall.
