BUTUAN CITY – Laumang madugangan pa ang mga kasong kriminal nga ipasaka batuk kang kanhi Negros Oriental 3rd District Representative Arnolfo Teves Jr. higayong ma-extradite na o mabalik na kini sa nasud.
Sigon ni Pamplona Mayor Janice Degamo, ang biyuda sa gipatay nga si late Negros Oriental Governor Roel Degamo, daghan pang mga biktima sa kabangis sa kanhi magbabalaud ang andam mu-atubang ug mutestigo sa korte.
Mala-umon kining mapaspasan na ang pagpabalik kang Teves aron atubangon na ang mga kasong gipasaka batuk kaniya.
Nasayrang si Teves ang gitudlong utok sa pagpatay kang Gov. Roel Degamo ug lain pang siyam niadtong Marso ning mi-aging tuig.
Apil sa mga kasong gi-atubang niini ang murder, attempted murder ug frustrated murder apil na ang kasong duna’y kalambigitan sa pagpamatay nga natigayon niadtong 2019.
Sa pagkakaron, wala pa’y insaktong adlaw kung kanus-a mapabalik sa nasud ang kanhi magbabalaud.
