BUTUAN CITY – Nagpadayon ang clearing ug pursuit operation sa militar aron hingpit nga magukod ang nabiling miembro sa Sandatahang Yuniy Pampropaganda Platoon sa Guerilla Front 19, sa Northeastern Regional Committee (NEMRC) nga naka-engkwentro sa 3rd Special Forces Battalion Philippine Army diin napatay ang anak nga babaye ni Bayan Muna Partylist Representative Eufemia Cullamat nga si Jevilyn Campos Cullamat alyas Reb, 22-anyos sa Brgy. San Isidro, Marihatag, Surigao del Sur adtong Sabado sa alas-kwatro sa hapon, November 28.
Sa pakighinabi sa Bombo Radyo Butuan, gibutyag ni 1st Lt. Krisjuper Andreo Punzalan, Civil Military Operations (CMO) officer sa 3rd Special Forces Battalion, Philippine Army, nagsilbi matud pang medic ang kinamanghurang anak ni Rep. Cullamat sa SYP Platoon, Guerilla Force 19 sa NEMRC sa Surigao del Sur.
Gipadayag usab sa opisyal nga bisan adto pang Sabado natigayon ang enkwentro apan kagahapong pa lang nila napagawas ang report tungod kay ila pang gisiguro ang identity ni Jevilyn nga nakumpirma usab pinaagi sa 9 ka kanhi rebelde nga naka-uban niini sa grupo ug igsuon niini nga mi-adto sa kampo sa militar.
Sa karon gihaya na sa usa ka punirarya ang patayng lawas sa anak ni Cullamat sa Surigao del Sur.
Gibana-banang anaa sa 30 ka mga aramadong rebelde ang naka-ekwentro sa militar.
Nakekober usab sa mga sundalo ang pila high powered nga mga armas ,bala ug dokumento human ang 45- ka minuto nga engkwentro.
Nagpagawas gilayon og pamahayag si Rep. Cullamat nga dili hanap ang posibilidad nga subling gamiton sa militar ang pagkapatay sa iyang anak aron iduot sa sayop nga akusasyon ang Makabayan bloc.
Aminado ang kongresista nga sayod siya sa pag-apil sa anak sa NPA tungod sa nasinatian nilang pag-abuso sa kamot sa Armed Forces of the Philippines.
