BUTUAN CITY – Migikan na kaganinang kaadlawon ang duha ka mga dump trucks nga gikargahan sa mga relief goods nga gipadala sa lokal nga kagamhanan ning siyudad sa Butuan ngadto sa mga biktima sa linog sa Makilala, North Cotabato.
Sigon ni May Diez, Public Information Officer sa Butuan City Government, kagahapong adlawa gikarga ang mga relief goods pinaagi sa tabang sa mga personahe sa 23rd Infantry Battalion, Philippine Army ug Butuan City Police Office.
Miabot sa 120 ka sakong bugas ang nakarga alang sa 2-mil ka mga pamilya, anaa pa ang mga delata, kape, tag-4 litros nga purified water, hygiene kit, kitchen utensils, habol og banig.
Samtang dunay pribadong kompanya nga mihatag og trapal.
Muderetso na ngadto sa Makilala, North Cotabato ang nasangpit nga biyahe nga giubanan sa mga personahe sa City Disaster Risk reduction and management Office kon CDRRMO og City Social Welfare and Development kon CSWD.
Sumala pa ni Diez, na-identify na ang mamahimong benipisyaryo sa nasangpit nga relief goods.
Samtang gipaabot usab ni Butuan City Mayor Ronnie Vicente Lagnada sa mga biktima sa linog nga nakig-simpatiya ang mga Butuanon.
