(pictures courtesy of Alexis Cabardo)
BUTUAN CITY – Gi-andam na ang kasong ipasaka batuk sa 5 ka indibidwal nga nasikop atol sa implementasyon sa sunod-sunod nga search warrants kagahapon sa alas 9:00 sa buntag sa may Barangay Balit, lungsod sa San Luis, sakop sa probinsiya sa Agusan Del Sur.
Sigon ni P/Sr. Insp. Emerson Bajao, hepe sa San Luis Municipal Police Station, nakig-alayon sila sa mga sakop sa 26th Infantry Battalion, Philippine Army sa pagpatuman sa 8 ka search warrants alayon na sa gipakusgang kampanya batuk sa loose firearms.
Pagkumpirma pa sa opisyal, nakuha nila ang 5 ka indibidwal nga gitago una ang mga pangalan tungod sa gihimu pang proseso.
Nakumpiska usab sa maong operasyon ang 2 ka granada, 1 ka kalibre .38 nga pistola, upat ka Improvised Explosives Devices kon IEDs, 4 ka blasting caps, 2 ka detonatong cord ug laing 2 rifle granades og usa ka NPA flag.
Gikustudiya na sa San Luis Municipal Police Station ang nakuhang mga butang lakip na ang nadakpang mga suspetsado alang sa tukmang disposasyon. (Rolan Janea)
