BUTUAN CITY – Giklaro ni Commission on Elections kon COMELEC chairman George Erwin Garcia nga napamatud-an na niya nga pulos mga peke ang gika-ingong iyang mga foreign bank accounts apil na ang mga dokumento subay sa peke usab nga mga alegasyong gihapak batuk kaniya.
Sa eksklusibong pakighinabi sa Bombo Radyo Butuan, gipadayag ni Garcia nga gawas sa gikutay kaniyang 49 ka mga face accounts, wala pa gi-apil niini ang bag-ong duha kansa gila-uman niyang mu-abot na unya og 100 sa pagtapos ning bulana.
Tungod kay dili siya maka-tumbok og tawong nagdaut sa iyang pangalan ug sa ilang ahensya tungod sa kawala niya’y immunity from suit, ang iyang gihimo mao ang pagsulat sa National Bureau of Investigation kon NBI ug sa Anti-Money Laundering Council aron hatagan sila og kopya sa findings sa ilang imbestigasyon.
Gawas niini, nagpadala na usab siya og sulat ngadto sa Department of Justice sa Estados Unidos aron ma-aksyunan gilayon ang iyang reklamo nga gikonsidera niyang bank fraud, identity theft ug anti-money laundering.
Kampante siyang aksyunan sa US-DOJ ang iyang reklamo ilabina nga siguradong makutay kini kasong ilang gipasaka sa Florida batuk kang Bautista ug sa tulo ka mga opisyal sa Smartmatic nga sila Smartmatic President Roger Alejandro Piñate Martinez, kanhi Smartmatic Philippines General Manager Elie Moreno, ug Smartmatic Taiwan leader Jose Miguez Vasquez.
