BUTUAN CITY – Mihimo na og imbestigasyon ang Cyber-security Bureau sa Department of Information and Communications Technology kon DICT kalabot sa nanggawas karong mga pekeng Facebook Accounts.
Sa eksklusibong pakighinabi sa Bombo Radyo Butuan, gipadayag ni DICT assistant secretary Alan Silor nga ka-uban nila sa imbestigasyon ang National Privacy Commission kon NPC kondiin sa pagkakaron nakig-alayon na sila sa Facebook Philippines aron makuha gikan kanila ang kasiguruhang dili na kini ma-usab pa isip proteksyon usab sa milyunes nilang mga users.
Sigon ni Engr. Silor, kaniadto pa kini nga problema apan karon lang na-highlight human nga mibati na og kabalaka sa ilang siguridad ang nabiktima sa identity hacking kon naghimo og susama apan peke nilang account.
Aminado ang kalihim nga dako kaayo og gamit sa mga netizens ang Facebook ilabina karong panahon sa pandemic aron mapa-abot ngadto sa ilang mga kahigalaan, mga kabanay, ka-ubanan sa trabaho ug uban pa, ang mga gusto nilang ipa-ambit nga impormasyon.
Mala-umon ang opisyal nga human sa imbestigasyon, masilutan na ang mga responsable sa maong modus aron wala na’y maghuna-huna pa nga maghimo niini.
Nagpahimangno siya sa tanan nga aron masigurong dili ma-hack o kaha mapeke ang account, kinahanglang i-search kung duna ka’y susama og pangalan sa Facebook ilabina ug susama pa og profile picture sa ingon mapahibalo gilayon kini ngadto sa imong mga higala ug kabanay.
Kinahanglang dili usab ihatag ngadto ni bisan kinsa ang imong mga impormasyon ilabina ang kabahin sa imong identity aron malikayan ang pag-hack niini.
