BUTUAN CITY – Posibleng mag-atubang og pipila ka mga consequences ang mga empleyado sa gobyerno nga nakig-selfie sa mga wanted nga indibidwal.
Sigon ni Civil Service Commissioner Aileen Lourdes Lizada, dapat musunod ang mga empleyado sa gobyerno sa Republic Act 6713, kon mas na-ilang Code of Conduct and Ethical Standards for Public Officials and Employees.
Gipasabot sa opisyal nga sa ilang pagtrabaho sa buhatan sa gobyerno, dili ilang pangalan ang madumduman sa mga tawo kondili ang ahensyang ilang gitrabahuan. Sigon ni Lizada, ang mga mulapas sa RA 6713, pamultahon og dili mulabaw sa 6 ka buwang kantidad sa ilang suweldo, o suspindihon og kapin sa usa ka tuig.
Una nang mitumaw ang isyu human ang pag-aresto kang kanhi Bamban mayor Alice Guo sa Indonesia dihang nagpakuha og litrato ang mga empleyado sa gobyerno nga gibatikos og maayo sa social media.
